نفسي أكتب أكتب كتتتير مش شغل عايزة أكتب عن نفسي
علشان كده قررت أكتب عن أكتر حاجات كانت موجوده السنه ديه وحسيت اني بحبها النهردة" أشمعنى النهردة؟
علشان بكرة ممكن يتغيروا ويجي حاجات تانية أحسن او أوحش منها الله اعلم
- سايدر القط الجميل بتاعي
- الشيكولاته
- الصحراء لوحدي بليل وأنا مولعه الكشاف وببص للنجوم
- البيتزا مع صحبتي وإحنا بناقش مشاكلنا الوجودية
- اون ذا راند طريق مصر إسكندرية الصحراوي عند بوابة العجمي, وأنا وقفة أشرب موكة ومتكتكه من البرد
- إسكندرية عشقي الوحيد السنة ديه
- سينما ستي ستارز
- المكتبات وخصوصاً ديوان أو ألف
- اللوحة إلي عندي في الأوضة والأحلام إلى مكتوبة عليها
- شكلي وأنا في البلاتوة و وقفة ورا الكاميرا متحفزة وخايفة أن الضيف يغلط
- شكلي برضة وانا في عربية البث ومساكة المايك وبهاتي مع المذيعة وبفكرها ب الأسئله إلى في الأغلب بتتنسي
- الغرز مع صحبتي في العربية والجنان
- الوحدة بشكل خاص
- أسمي لما يكون مكتوب على موضوع جامد, أو لما يكون مكتوب على تيتر برنامج جامد برضة
- دعاء صحبتني والكلام والكلام بلا هدف سوا الكلام
- محمد صحبي وأخوية العزيز وهو رايق وبنتلكم عن الحب ومشاكل البنات معاه
- شيمو صحبتي وإحنا بنم اخر الليل على مخليق ربنا
- يوسف وهو بيتصل بيا وبيقولي فين الشغل يابنتي
- سماح وخوفها عليا
- الورد
- الموبيل بتاعي وصورة "خافير بارديم"إلى عليه:)
- كتاب طعام وصلاة وحب من أحسن الكتب إلى حستها شبهي اوي
- السفر بلا هدف سوى الأستمتاع
- الأقلام الملونه والفواصل بتاعت الكتب
- الاب توب الجديد بتاعي ,, والأي بوت إلى هجيبة إن شاء الله الفكرة نفسها مفرحاني
- مطعم سبكترا المنتزة
- كورسات الرسم والفن والشغل العالي
- الكاميرا الجديد بتعتي والتصوير
بس كده السنة ديه مادخلتش في اي علاقات عاطفية ماحبتش شيء مذكر "غيرالقط بتاعي" , كانت سنه ذاتيه جدا
بعد سنة طاحنة للغاية
يمكن زعلانه شوية علشان بعدت عن شوية من صحابي, وبعدت برضة عن أهلي شوية كنت حسة اني محتاجة ابقى لوحدي لوحدي اوي
النهرده أنا فرحانه لما كتبت كده, حسة بالظبط إحساس جهاز كمبيوتر نزلت نسخة ويندوز جديدة لجهاز كان خربان ومش عارف هو أسمة ايه اصلاً, نزلت النسخة وجبت هارد أوسع وغيرت حاجات كتير علشان لما نحط حاجات جديدة تشتغل بسرعه من غير روتين وقرف وأحكام وإستنتاجات هبلة وكل شوية تهنج وتنكد عليا
:)
أنا سعيدة الحمدالله يارب ديمها نعمة, وأجعل السنة إلى جاية أكتر براح ودفا
