مساء الخير ياصديقتي الهنديه
اهلا بيكي في دوله المتوحد
الخالي من عيوب الأنتاج المعرفة المتميز بعيوب جديدة
أهمها ضعف النظر اهلا بيكي ورا سور الدوله العالي
أول بيت يمين هتلاقي يافطه عليها اسمي
ربان اعالي البحار لو لقيتي قدام البحر قواقع
اعرفي إن البحر في ضيافتي النهاردة
والرملة معناها إني وحيد
طول اليوم عينيا على الباب ومش عايز ادخل حد
بس المشكله إني سايب الباب مفتوح
وباقطع مشاوير جوه
الفيلاوارجع اقف قدامه بالساعات
وفي المسافة مابين وقفتي والباب
طرقه فخورة بكل اللي عدوا منها
وهمه خارجين مهزومين
أنا المتوحد
أشهر سفاح في المدينه
الفاضله وأول واحد يرفض يكون معروف
لانه عارف كل حاجه أنا باثار الغرز
اللي في باطني وبصدري المفتوح
وبكل المغناطيسيه اللي في جسمي
بارحب بصديقتي الهنديه ومذهول من توقيت ظهورك
في وقت مناسب لأي حاجه
لانتحار جماعي هيبداء بدردشه أخويه
أو لدردشه أخويه
ممكن تاخدنا لانتحار جماعي ممكن كمان أحاول المسك
بقالي كتير مش قادرألمس حاجه ومجتاج أقفل الدايرة
بحد يسحب منى الكهرباء علشان
لما الدنيا تنور يقدر يشوفني صح
فاقدر أشوف نفسي في عنيه اهلا بيكي في
full moon
بفستانك الهندي البسيط
وترددك الجذاب الواضح في ابتسامتك الجميلة
أرجوكي اتعاملي كأنه بيتك وإوعي تخافي مني
المتوحد لايؤذي أحد
يؤذي نفسه فقط
أنا مش دركولا يمكن أكون متاهه
ودا أخطر بس الحل سهل
ممكن ماتدخليش أنا عمري ماأفرض متاهتي على حد
وأنا سايب الباب مفتوح
لان المتاهة في الاخر بتوصل للباب
اللي بالمناسبه
لازم يكون مفتوح
والمتاهه سهله وانتي نفسك طويل
هوا البحر اللي فتح صدري
خلاني أنجذب ديما للي نفسهم طويل
أهلا بيكي
ولو هتدخلي أستأذنك ماتقفليش وراكي الباب
وسيبي لي نفسك
صحيح أنا ربان أعالى البحار
نظرة ضعيف بس احلف لك
طول عمرى ماشي في البحر بقلبي
........................
من ديوان (قهوة وشيكولاته
عمر طاهر
